Prej 10 ditësh qirinjtë në hyrje të shkollës “Fan Noli” nuk janë shuar. Shokët, nxënës, prindër e mësues mbajnë ndezur dritën në kujtim të 14-vjeçarit Martin Cani, i cili u vra me thikë nga shoku i klasës paralele. Edhe komuniteti i prindërve e ka nisur protestën nga shkolla “Fan Noli”.
Në këtë javë të dytë pas ngjarjes së rëndë dhe dyshimeve të ngritura për moszbardhjen e plotë të krimit, prindërit e kanë nisur marshimin drejt Ministrisë së Arsimit me thirrjet për drejtësi. Ata kërkojnë zbardhjen e plotë të ngjarjes dhe ndëshkimin e të gjithë autorëve të përfshirë në konflikt. Ishin më të paktë në numër se sa në marshimin e parë.
Edhe bojkoti i mësimit, i lajmëruar prej tyre, nuk gjeti mbështetje as nga prindërit në Tiranë e as në rrethe. Me të hyrë në rrugën e Durrësit, prindërit protestues ju bënë thirrje qytetarëve që ndodheshin në baret dhe lokalet përreth, t`i bashkoheshin marshimit, për kauzën e përbashkët.
Me të mbërritur para Ministrisë së Arsimit prindërit dhe shoqëria civile kërkuan dorëheqjen e ministres Ogerta Manastirliu, përgjegjëse sipas tyre për mungesën e sigurisë në shkolla.
Rritje të buxhetit për arsimin, shtimin e punonjësve të sigurisë dhe punonjësve psiko-socialë si dhe zgjatjen e kohëqëndrimit të fëmijëve në shkollat publike, ishin kërkesat e të prindërve në protestën e tyre të tretë.
