Kryeministri Albin Kurti është intervistuar gjatë nga autorja e emisionit “TopStory” në TopChannel, Grida Duma.
Ajo e sfidoi kryeministrin Kurti që të flasë për investimet që qeveria e tij i ka bërë në mandatin e saj katër vjeçar.
Por Kurti, zgjedhjet e nesërme, pothuajse të parat të rregullta e të zakonshme në Kosovën e pasluftës, i quajti të jashtëzakonshme.
“Këto janë zgjedhjet e para të rregulla që prej shpalljes së pavarësisë së Kosovës. Jemi qeveria e parë që e përmbyllim mandatin katër vjeçar. Ndonëse janë zgjedhje të rregullta, nuk janë zgjedhje të zakonshme, meqenëse ajo çfarë kemi bërë në këto katër vite është e paparë në Kosovën e pasluftës”, deklaroi Kurti, teksa përmendi “rritjen ekonomike, rishpërndarjen sociale dhe sovranitetin e integritetin territorial”.
“Ditën e nesërme”, tha ai, “nuk e quajmë ditë të zgjedhjeve, por të referendumit”.
Por, Grida Duma i tha se termi referendum është “term shumë populist”.
“Për një kryeministër që ka pasur katër vjet mandat të gjatë në Kosovë dhe që kundërshtari i thotë ke pasur më shumë pushtet se të tjerët, je në disproporcion me fuqinë që ke pasur në raport me arritjet”.
Duma e pyeti nëse rishpërndarja e buxhetit është populizëm, pasi sipas saj, “kundërshtari politik iu thotë se iu mungojnë investimet kapitale, e keni dyfishuar tatimin për pronën, ju thotë që energjinë, ndërsa ishit në opozitë keni deklaruar fort se do ta ulni por në qeveri e keni dyfishuar çmimin, iu thotë se kjo rishpërndarja juaj nuk është gjë tjetër veçse mungesë e investimeve në total”.
