Ish-kryeshefi i KQZ-së, Adnan Merovci, lavdëroi popullin e Kosovës për zgjedhjet e 9 shkurtit, duke e quajtur procesin zgjedhor më korrekt dhe me mbulueshmëri dhe me plotësim të standardeve ndërkombëtare.
Duke diskutuar lidhur me zgjatjen e numërimit të votave, Merovci për emisionin Edicioni Special në Klan Kosova u shpreh se ka ndikuar edhe fakti që në këto zgjedhje është zbatuar ligji i ri, e që ka afektuar edhe numërimin e votave.
“Për herë të parë ka hyrë në fuqi rregulli që numërimi të bëhet në qendrën e numërimit, se deri tani ka qenë që numërimi të behët në vendvotim, por në qendër të shkohet për kandidat, etj”.
“Për herë të parë është përfshirë metoda digjitale. Webfaqja e KQZ-së i ka disa komponente, webi është diçka tjetër dhe linku në të për rezultate është diçka tjetër”.
“Është çështja e softwerëve shtesë e pajisjeve për përfshirje të të dhënave dhe dërgim në server dhe shpërndarje pastaj në webfaqe, dhe tjetra ka qenë përmirësimi i infrastrukturës së IT-së që kanë qenë prej dy burimeve: e para ka qenë prej OSBE-së me tender dhe OSBE-ja e ka përcjellë, dhe e dyta është ndihma në infrastrukturë të IT-së që nuk ka të bëjë me këtë sistem, e që ka qenë një donacion gjerman, për të cilin sot dëgjova që ambasada ka thënë se nuk është aplikuar”.
“Nuk janë testuar mjaftueshëm këto pajisje. Diku kanë pasur probleme me rrymë e internet. Deri tani nuk ka qenë ky problem se krejt kutitë janë bartur në një vend në Prishtinë dhe i gjithë koncentrimi ka qenë aty. Tash potenciali është që në mbi 30 komuna të lind nga një problem”.
“Problemet në ueb faqe të KQZ-së mund të jenë edhe për shkak të faktorit njeri. KQZ është institucion i pavarur kushtetues dhe atij i besohet kjo punë. KQZ gabimin më të madh e ka bërë që nuk ka reaguar menjëherë kur ndodhi problemi në webfaqe”, deklaroi mes tjerash Merovci.
Lidhur me vonesat që po ndodhin në procesin e numërimit të votave, Merovci tha se ne duhet t’i besojmë KQZ-së.
“Edhe teknikalitetet për numërim kanë ndryshuar kësaj radhe. Nuk duhet satanizuar KQZ-në. Votat janë në kuti, procesi dhe saktësia e rezultatit s’ka për të lëvizur kurrë. Asnjëherë nuk bën me e hup besueshmërinë në KQZ”, përfundoi Merovci.
