Kryetari i LDK’së, Lumir Abdixhiku, ka uruar Kosovën për 17 vjetorin e shpalljes së pavarësisë. Ai ka thënë se Kosova shtet është arritja më e madhe.
“Kosova shtet, Republikë, është arritja më e madhe e jona. Është shpagim i përpjekjes së gjeneratave të tëra për çlirim e pavarësim; është mburojë e garantuar për të gjithë ata që vijnë.”
Ai ka përmendur ish presidentin Ibrahim Rugova, familjen Jashari, luftëtarët e UÇK’së dhe aleatët e Kosovës.
“Në këtë ditë nderojmë Atin Themeltar të kësaj Republike, Presidentin Dr. Ibrahim Rugova prirja e së cilit – në orët tona më të rënda – dha dritë. Sot nderojmë gjithë luftëtarët, martirët e dëshmorët e luftës sonë çlirimtare, të Ushtrisë sonë Çlirimtare, nderojmë Familjen Jashari, sakrifica e të cilëve na qëndron si gurëthemel i vet lirisë. Nderojmë aleatët tanë, ata që bënë luftën me ne, bënë paqen me ne!”
Ai ka shtuar se dashurinë për shtet s’mund ta zhbëjë përplasja jonë e brendshme.
“Në këtë përvjetor të 17-të, le të kujtojmë se dashurinë për pavarësi e shtet s’mund ta zhbëjë përplasja jonë e brendshme. Përplasja është e përkohshme, atdheu ynë është i përhershëm. Ky atdhe na thërret të vazhdojmë rrugëtimin secilën ditë! Sot, festojmë të gjithë! Veç një Kosovë kemi. Urime dita e pavarësisë!”
