Zëdhënësi i Kremlinit, Dmitry Peskov, tha për CNN se është “shumë pozitive” që zyrtarët amerikanë dhe rusë do të mbajnë bisedime në Riad të Arabisë Saudite, për ta diskutuar përmirësimin e marrëdhënieve Moskë-Washington dhe përfundimin e luftës në Ukrainë.
“Është mirë dhe shumë pozitive që po mblidhemi për të folur. Por është paksa e parakohshme për ta bërë ndonjë prognozë. Le të presim deri të martën dhe të shohim se si do të jetë nisja e dialogut”, tha Peskov.
Diskutimet do të fillojnë të martën në kryeqytetin saudit. Delegacioni i SHBA do të përfshijë Sekretarin e Shtetit Marco Rubio, këshilltarin e Sigurisë Kombëtare Mike Waltz dhe të dërguarin e posaçëm për Lindjen e Mesme Steve Witkoff, konfirmoi më herët Departamenti i Shtetit.
Sipas Kremlinit, delegacioni rus do të përfshijë ministrin e Jashtëm Sergej Lavrov dhe ndihmësin presidencial Yury Ushakov. Kirill Dmitriev, kreu i fondit të pasurisë sovrane të Rusisë, gjithashtu do t’i bashkohet bisedimeve, tha një burim për CNN.
