Një marrëveshje për lirinë e lundrimit në Detin e Zi për të siguruar mbrojtjen e anijeve civile dhe infrastrukturës portuale “do të jetë një kontribut vendimtar për sigurinë globale të ushqimit dhe zinxhirët e furnizimit”, tha të mërkurën zëdhënësi i OKB-së, Stephane Dujarric.
Shtetet e Bashkuara njoftuan marrëveshje të veçanta me Ukrainën dhe Rusinë të martën për të ndalur sulmet e tyre në Detin e Zi dhe kundër objektivave energjetike të njëri-tjetrit, por retorika nga Moska dhe Kievi sugjeroi se ato mbetën shumë larg.
Kombet e Bashkuara kanë punuar vazhdimisht për këtë çështje, tha Dujarric, veçanërisht që kur Sekretari i Përgjithshëm i OKB-së Antonio Guterres u shkroi liderëve të Ukrainës, Rusisë dhe Turqisë në shkurt të vitit të kaluar për të paraqitur “një propozim për lundrim të sigurt dhe të lirë në Detin e Zi”.
