Lidhja Demokratike e Kosovës, ka deklaruar se Lëvizja Vetëvendosje është ajo që sërish e ka bllokuar seancën e konstituimit të Kuvendit të Kosovës,
Nga kjo parti është thënë se deputetët e saj kanë qenë prezentë në sallë, dhe se, Avni Dehari që është kryesues i seancës, e ka shkelur Rregulloren e Kuvendit.
‘‘Sërish Lëvizja Vetëvendosje bllokoi seancën e konstitutimit të Kuvendit.
Të njëzet deputetët e Grupit Parlamentar të Lidhjes Demokratike të Kosovës ishin prezent. Fatkeqësisht, kryesuesi i kësaj seance, nga radhët e LVV-së, shkeli Rregulloren e Kuvendit duke thirrur fillimisht për konsultime politike, pa qenë i autorizuar dhe pa pasur mandat për një gjë të tillë’’, është thënë nga LDK-ja.
Tutje, nga kjo parti në komunikatën e saj, është shtuar se skenari i mbledhjes s’është respektuar edhe se, kishte kushte që të vazhdonin aty.
‘‘Skenari i mbledhjes konstituive nuk u respektua, ani pse kishte kushte që të vazhdonin aty ku ishte ndërprerë kjo seancë më 15 prill. Prezent ishin 100 deputet, pra kishte kuorum për të vazhduar me votimin e raportit të Komisionit, aty ku ishte ndërprerë seanca.
Veprimet e sotme të LVV-së shpërfaqin bllokimin e tyre faktik për konstituim të Kuvendit dhe themelim të institucioneve’’, ka shkruar në komunikatë LDK-ja.
