Policia e Kosovës, përkatësisht Drejtoria për Hetimin e Krimeve të Luftës, në bashkëpunim me Prokurorinë Speciale – Departamenti për Krime Lufte, ka ndërmarrë një aksion të gjerë operativ që ka rezultuar me arrestimin e tre personave të dyshuar për krime lufte kundër popullatës civile gjatë viteve 1998-1999.
Pas një periudhe të gjatë hetimore, autoritetet policore kanë lokalizuar dhe arrestuar fillimisht dy të dyshuar në qytetin e Lipjanit, në dy lokacione të ndara.
Bëhet fjalë për B.T. (mashkull) dhe N.Č. (femër). Në vazhdën e operacionit, është arrestuar edhe i dyshuari i tretë, M.I. (mashkull), në qytetin e Prishtinës.
Të dyshuarit akuzohen për përfshirje në krime lufte kundër popullatës civile, konkretisht për maltretim, rrahje dhe torturim fizik e psikik të të ndaluarve shqiptarë gjatë periudhës së luftës, teksa shërbenin si gardianë dhe zyrtarë korrektues në Burgun e Prishtinës dhe Qendrën Korrektuese të Lipjanit.
Të arrestuarit janë shoqëruar në zyrat e Drejtorisë për Hetimin e Krimeve të Luftës dhe aktualisht janë duke u intervistuar nga hetuesit përkatës.
Policia e Kosovës ka theksuar përkushtimin e saj për të vazhduar me hetimet dhe bashkëpunimin e ngushtë me autoritetet relevante, me qëllim të sigurimit të drejtësisë për krimet e kryera gjatë luftës në Kosovë.
