Në një reagim të ashpër dhe të vendosur, Lumir Abdixhiku, kryetar i LDK-së ka përcjellë një mesazh të qartë kundër praktikave të një pjese të politikës së vendit që, sipas saj, po funksionojnë përmes mashtrimeve, fyerjeve dhe vendimeve arbitrare. Në një deklaratë publike që ngërthen zhgënjimin dhe vendosmërinë për ndryshim, LDK nënvizon se me individë dhe qasje të tilla nuk mund të ketë as takime produktive e as mirëkuptim politik.
“Të takojnë, të mashtrojnë!”, thuhet në deklaratë, duke theksuar hipokrizinë e atyre që, sipas partisë, ofrojnë bashkëpunim vetëm për të ofenduar dhe përjashtuar më pas. LDK kritikon ashpër këtë stil politik që nuk njeh as etikën njerëzore, as dialogun, dhe as respektin për kundërshtarin politik.
Për këtë arsye, LDK shpreh qartë qëndrimin e saj: Kjo politikë duhet të marrë fund!
Partia e qendrës së djathtë, që historikisht ka luajtur një rol të rëndësishëm në zhvillimet demokratike të vendit, e konsideron refuzimin e kësaj qasjeje si një interes të mirëfilltë kombëtar. Jo vetëm për veten e saj, por si një thirrje për të gjitha partitë politike që të mos dorëzohen dhe të mos nënshtruaren përballë kësaj kulture politike përçarëse.
“LDK e ka të qartë. Prandaj është konsistente. Para, gjatë e pas zgjedhjeve.”, vijon mesazhi, duke theksuar qëndrueshmërinë dhe parimet e palëkundura të partisë.
Në përmbyllje, LDK shpreh krenarinë që ndjen për mbështetësit e saj dhe për çdo qytetar që refuzon të bëhet pjesë e një politike që përçmon njeriun dhe dinjitetin. “Prandaj votuesi e mbështetësi i LDK-së sot rri krenar!”
Ky mesazh vjen në një kohë kur skena politike në Kosovë po përballet me tensione dhe polarizim të thellë, ndërsa qytetarët gjithnjë e më shumë kërkojnë përgjegjësi, etikë dhe qartësi politike.
