Presidenti i Republikës së Serbisë, Aleksandar Vuçiq, ka njoftuar se ka arritur për një vizitë në Federatën Ruse me rastin e shënimit të Ditës së Fitores më 9 maj në Moskë, raporton Anadolu Agency.
“Pas shumë vitesh, përsëri në Moskë. Jam krenar për luftën antifashiste të popullit tim serb dhe mirënjohës për ndihmën e madhe që kemi pasur nga Ushtria e Kuqe gjatë çlirimit të Serbisë”, ka shkruar Vuçiq në Instagram.
Më herët, ai qëndroi në Baku në pritje të miratimit për të vazhduar fluturimin drejt Moskës, për shkak të veprimeve luftarake mes Rusisë dhe Ukrainës.
Ndihmësi i presidentit të Rusisë, Jurij Ushakov, deklaroi dje se presidenti rus, Vladimir Putin, do të zhvillojë bisedime bilaterale me presidentin e Serbisë, Aleksandar Vuçiq, më 9 maj.
Në Moskë, më 9 maj, me Paradën e Fitores do të shënohen 80 vjet nga fitorja ndaj fashizmit në Luftën e Dytë Botërore, dhe presidenti Vuçiq kishte paralajmëruar më parë se do të marrë pjesë në shënimin e Ditës së Fitores në Moskë, pavarësisht të gjitha presioneve, dhe se do ta përfaqësojë me krenari Serbinë në përvjetorin e 80-të të fitores ndaj fashizmit.
Takimi me ambasadorin rus
Vuçiq është takuar këtë mëngjes, para nisjes për në Moskë, me ambasadorin e Federatës Ruse në Serbi, Aleksandar Bocan-Harçenko, me të cilin ka diskutuar për çështje me rëndësi të ndërsjellë, si energjia, siguria, forcimi dhe zgjerimi i bashkëpunimit dypalësh, si dhe për situatën aktuale në rajon dhe në botë.
Sipas agjencisë nga Serbia, të gjitha shtetet kishin dhënë më parë lejen për fluturim, por më pas u desh të pritej për shkak të veprimeve luftarake. Në atë moment, edhe aeroportet e Moskës ishin të mbyllura.
Anadolu kujton se në ditët e fundit disa aeroporte në qytete të ndryshme ruse janë mbyllur për shkak të sulmeve me dronë ukrainas.
Takimet e para të punës pas problemeve shëndetësore
Përveç takimit me ambasadorin rus, Vuçiq është takuar mëngjesin e sotëm edhe me ambasadorin e Mbretërisë së Bashkuar, Edward Ferguson.
Këto ishin takimet e para të punës të presidentit të Serbisë pas mungesës për shkak të problemeve shëndetësore, të cilat e detyruan të ndërpresë vizitën në SHBA javën e kaluar, raporton Anadolu.
Hina kujton se Vuçiq, për shkak të tensionit të lartë dhe problemeve shëndetësore që ndjeu gjatë qëndrimit në Florida, ku priste një takim me presidentin amerikan Donald Trump, ndërpreu vizitën të shtunën dhe u kthye në Beograd.
Ai u kontrollua nga një ekip i përbashkët mjekësor në Akademinë Ushtarako-Mjekësore (VMA), dhe mjekët njoftuan se gjendja e tij është “aktualisht e kënaqshme”, por “nuk është reale që të kthehet në aktivitete të rregullta në ditët e ardhshme”.
Pakënaqësi nga Brukseli
Kryetari i Partisë Përparimtare Serbe, Millosh Vuçeviq, dhe ish-kryeministër, tha këtë mëngjes për mediat në Beograd se Vuçiq do t’i drejtohet publikut në “orët e pasdites ose të mbrëmjes”, por mbeti i fshehtë në lidhje me vendin nga ku do të flasë.
“Do të shohim nga ku”, tha Vuçeviq.
Mediat në Serbi kanë spekuluar ditët e fundit se dy shtete baltike, thuhet, e kanë ndaluar fluturimin mbi hapësirën e tyre për presidentin serb drejt Moskës, ndaj nuk dihet se përmes cilit korridor ka udhëtuar për në kryeqytetin rus.
Me paradën tradicionale në Sheshin e Kuq, Rusia më 9 maj do të shënojë 80-vjetorin e fitores ndaj fashizmit në Luftën e Dytë Botërore, dhe pritet që festës t’i bashkohen “më shumë se 20 liderë botërorë”.
Brukseli më parë i ka bërë të qartë Beogradit se nuk do ta shohë me sy të mirë një vizitë të mundshme të Vuçiqit në Moskë, duke theksuar detyrimin e Serbisë që, si vend kandidat për anëtarësim, të harmonizojë politikën e saj të jashtme dhe të sigurisë me atë të Bashkimit Evropian.
Parlamenti Evropian të mërkurën miratoi një raport në të cilin kritikon ashpër autoritetet në Serbi, i bën thirrje Beogradit që të harmonizojë politikën e jashtme me BE-në dhe shpreh keqardhje që Serbia vazhdon të mbajë marrëdhënie të ngushta me Rusinë, si dhe për rënien e vazhdueshme të mbështetjes publike për anëtarësimin në BE në Serbi, krahas rritjes së mbështetjes për regjimin e Putinit.
