Prishtinë, 12 Maj 2025 – Në një takim të mbajtur sot në zyrën e kryeministrit në detyrë, Albin Kurti, kanë marrë pjesë ambasadorët e pesë vendeve të QUINT-it: Shtetet e Bashkuara të Amerikës, Mbretëria e Bashkuar, Italia, Gjermania dhe Franca.
Sipas burimeve nga mediat, temë kryesore e diskutimeve ka qenë kriza institucionale që ka përfshirë vendin pas zgjedhjeve të 9 shkurtit. Mungesa e konstituimit të Kuvendit të Kosovës edhe pas më shumë se tre muajsh nga zgjedhjet, si dhe pas 14 tentativave të dështuara, ka ngritur shqetësime serioze tek partnerët ndërkombëtarë të Kosovës.
Në takim, përveç krizës politike, është diskutuar edhe për gjendjen aktuale të sigurisë në veri të vendit, një zonë që mbetet e ndjeshme dhe e vëmendshme për komunitetin ndërkombëtar.
Pritet që ambasadorët e QUINT-it t’u bëjnë thirrje të gjitha partive politike që të tregojnë përgjegjësi shtetërore dhe të ndërmarrin hapa konkretë për zgjidhjen e ngërçit institucional, në mënyrë që vendi të mos futet në një krizë të thellë kushtetuese dhe funksionale.
Ndërkohë, zyrtarë të afërt me kryeministrin në detyrë nuk kanë dhënë ende detaje të plota nga takimi, por më shumë informacione priten në orët apo ditët në vijim.
Kriza institucionale po ndikon jo vetëm në funksionimin e Kuvendit dhe Qeverisë, por edhe në proceset integruese dhe stabilitetin politik të vendit.
