Mitrovicë e Veriut, 13 maj 2025 – Kompania paralele e ujësjellësit “Ibar” në Mitrovicën e Veriut është mbyllur zyrtarisht sot, njoftoi ministrja në detyrë e Ekonomisë, Artane Rizvanolli. Ajo bëri të ditur se vendimi është marrë me kërkesë të Njësisë për Monitorimin e Ndërmarrjeve Publike të Ministrisë së Ekonomisë.
“Sot është mbyllur kompania paralele e ujësjellësit ‘Ibar’ në Mitrovicën e Veriut, me kërkesë të Njësisë për Monitorimin e Ndërmarrjeve Publike të Ministrisë së Ekonomisë. Ky është një hap konkret që i shërben sundimit të ligjit dhe funksionalizimit të shërbimeve publike nga institucionet e shtetit tonë,” shkroi Rizvanolli në një postim në rrjetet sociale.
Sipas ministres në detyrë, kjo masë është në përputhje me marrëveshjen e nënshkruar në janar të këtij viti mes Kompanisë Rajonale të Ujësjellësit (KRU) Mitrovica dhe Komunës së Mitrovicës së Veriut. Sipas kësaj marrëveshjeje, shërbimet e ujësjellësit për qytetarët e kësaj komune do të ofrohen nga KRU Mitrovica, një kompani që operon nën juridiksionin e Republikës së Kosovës.
Rizvanolli ka shprehur mirënjohje për mbështetjen institucionale, veçanërisht Policisë së Kosovës dhe KRU Mitrovica.
“Falënderoj Policinë e Kosovës për mbështetjen dhe falënderoj KRU Mitrovicën për gatishmërinë për t’u shërbyer të gjithë qytetarëve të Republikës së Kosovës pa dallim. Ky është shteti ynë, këto janë institucionet tona, dhe ato do të jenë të vetmet që shërbejnë në Republikën e Kosovës,” shtoi ajo.
Ky zhvillim konsiderohet një hap i rëndësishëm drejt konsolidimit të shërbimeve publike dhe eliminimit të strukturave paralele në veri të vendit, duke forcuar sundimin e ligjit dhe integritetin institucional të Kosovës.
