Një varg bombardimesh të forcave izraelite javën e kaluar kanë rezultuar në eliminimin e liderit de facto të Hamasit në Gaza, Muhammed Sinwar, sipas raporteve të fundit të mediave ndërkombëtare. Trupi i tij është gjetur të dielën nën rrënojat e një tuneli nëntokësor, i ndodhur poshtë Spitalit Evropian në Khan Yunis, bashkë me numrin dy të grupit, Mohammad Shabana, dhe nëntë eprorë të tjerë të lartë të Hamasit.
Kanali saudit Al-Hadath raportoi se forcat izraelite kanë identifikuar kufomën e Sinwar në një operacion të përqendruar mbi një qendër komanduese të Hamasit, e cila ishte ngritur në një rrjet të tuneleve nëntokësore. Ndër viktimat u konfirmua edhe komandanti i Brigadës Rafah, Mohammad Shabana, duke i dhënë një goditje të madhe zinxhirit komandues të grupit islamik militant.
Raporte të tjera të pakonfirmuara sugjerojnë se edhe vëllai i Sinwar, Zakaria Sinwar, është vrarë të shtunën gjatë një përleshjeje të armatosur me forcat izraelite në jug të Rripit të Gazës.
Ndërkohë, ministri izraelit i Mbrojtjes, Israel Katz, deklaroi të dielën para Komitetit për Punë të Jashtme dhe Mbrojtje se, ndonëse ende nuk ka një konfirmim zyrtar, shërbimet izraelite të inteligjencës besojnë se Muhammed Sinwar është eliminuar gjatë operacioneve intensive javën e kaluar.
Muhammed Sinwar kishte marrë komandën e krahut ushtarak të Hamasit pas vrasjes së komandantit të mëparshëm, Muhammad Deif, në korrik të vitit të kaluar. Pas eliminimit të vëllait të tij, Yahya Sinwar, ai kishte marrë de facto drejtimin e plotë të Hamasit në Gaza.
Operacioni ushtarak i Izraelit, i koduar si “Karroca e Gideonit”, është shtrirë aktualisht në të gjithë territorin e Gazës, ku pesë divizione të ushtrisë janë të angazhuara në përpjekjet për të shkatërruar plotësisht infrastrukturën ushtarake të Hamasit dhe për të liruar pengjet izraelite.
Forcat Ajrore të Izraelit kanë intensifikuar fushatën ajrore, duke goditur të dielën mbi 160 caqe në Gaza. Sipas autoriteteve ushtarake, caqet kanë përfshirë njësi të armatosura të Hamasit, pika anti-tank, tunele nëntokësore, depo të armëve dhe një qendër tjetër komanduese të përdorur nga grupi.
Zhvillimet e fundit përbëjnë një kthesë të rëndësishme në ofensivën izraelite, ndërsa tensionet në rajon mbeten të larta dhe situata humanitare në Gaza vazhdon të përkeqësohet.
