Një sasi e konsiderueshme armësh është sekuestruar nga autoritetet doganore të Kroacisë në pikën kufitare të Tovarnikut, afër qytetit të Vukovarit. Sipas raportimeve nga mediat kroate, bëhet fjalë për 11 pushkë automatike dhe municion përkatës, të cilat janë gjetur në një automjet mallrash me targa të Kosovës.
Mjeti, i përdorur për transportin e automjeteve, ishte duke udhëtuar drejt Zvicrës dhe drejtohej nga një shtetas i Republikës së Kosovës, i shoqëruar nga një pasagjer, gjithashtu shtetas kosovar.
Zbulimi është bërë gjatë një kontrolli të detajuar të njërit prej automjeteve që ndodheshin në transportues. Autoritetet doganore, në bashkëpunim me policinë kufitare, kanë reaguar menjëherë pas zbulimit të armëve, duke i ndaluar dy të dyshuarit dhe duke nisur procedurat penale.
Të dy shtetasit e Kosovës dyshohen për veprën penale të posedimit të paautorizuar të armëve dhe eksplozivëve. Hetimet janë duke vazhduar për të zbardhur origjinën e armëve, si dhe destinacionin përfundimtar të tyre.
Zyrtarët kroatë nuk kanë përjashtuar mundësinë që rasti të lidhet me ndonjë rrjet të trafikut të armëve, duke theksuar se kontrolli në kufi mbetet i rreptë për parandalimin e aktiviteteve të paligjshme që rrezikojnë sigurinë publike.
Ngjarja ka ngritur shqetësime në lidhje me sigurinë dhe lëvizjen e lirë në rajon, ndërkohë që autoritetet kroate kanë konfirmuar se do të rrisin kontrollet për automjetet që hyjnë dhe dalin nga territori i tyre, sidomos ato që përdoren për transport mallrash.
Pritet që të dy personat të dalin përpara organeve të drejtësisë në Kroaci, ndërsa hetimet ndërkombëtare mund të përfshijnë edhe autoritetet kosovare dhe ato zvicerane nëse dyshohet për përfshirje të mëtejshme.
