Në një akt të rrallë fisnikërie dhe faljeje, pikërisht në ditën e shenjtë të Kurban Bajramit, familja Shala nga fshati Grazhdanik i Prizrenit ka falur gjakun e djalit të tyre, 17-vjeçarit Geltian Shala, i cili humbi jetën tragjikisht si pasojë e një aksidenti trafiku.
Ngjarja e rëndë kishte ndodhur si pasojë e përplasjes mes një veture dhe një motoçiklete, ku i riu Shala nuk arriti të mbijetojë.
Megjithë dhimbjen e thellë, familja vendosi të ngrejë një shembull të rrallë njerëzor, duke falur familjen e drejtuesit të makinës që ishte i përfshirë në aksident.
Ceremonia e faljes së gjakut u zhvillua në shtëpinë e familjes Shala, dhe u bë e mundur përmes ndërmjetësimit të pajtimtarëve të njohur Fetah Bekolli dhe Xhevat Kryeziu, me mbështetjen e imamit Qëndrim Gashi. I pranishëm në këtë akt simbolik ishte edhe drejtuesi i makinës.
Gazetari Nuhi Salihu, duke raportuar për emisionin “Ora Shtatë”, tha se ky akt pajtimi është një dëshmi e vlerave të larta që mbartin festa si Kurban Bajrami — vlera që nxisin faljen, mëshirën dhe solidaritetin njerëzor.
Ky veprim i familjes Shala ka prekur zemrat e shumë qytetarëve dhe është përshëndetur gjerësisht si një hap drejt paqes dhe pajtimit, duke rikujtuar se edhe në momente të rënda, njeriu mund të gjejë forcën për të falur.
