Një ditë pasi zhvilloi bisedime në Shtëpinë e Bardhë me presidentin amerikan Donald Trump, kancelari gjerman Friedrich Merz ka shprehur shqetësime për mungesën e vetëdijes në Senatin amerikan lidhur me ritmin e riarmatosjes së Rusisë.
“U takova me disa senatorë në Capitol Hill dhe u thashë që të shikojnë me kujdes çfarë armatosjeje po bën Rusia. Ata qartazi nuk kanë asnjë ide çfarë po ndodh atje tani,” deklaroi Merz, sipas Reuters, pa përmendur emra konkretë.
Që nga nisja e pushtimit të plotë të Ukrainës në shkurt 2022, Rusia ka kaluar fabrikat e saj të mbrojtjes në prodhim 24-orësh dhe ka nënshkruar marrëveshje armatimi me Korenë e Veriut dhe Iranin.
Këto veprime kanë rritur shqetësimet në Evropë, pasi disa zyrtarë paralajmërojnë se Moska mund të jetë në prag të arritjes së kapacitetit për të sulmuar territor të NATO-s.
Megjithatë, Moska mohon se ka synime të tilla, duke deklaruar se operacionet e saj ushtarake në Ukrainë synojnë mbrojtjen e sigurisë kombëtare përballë, siç e konsideron ajo, një Perëndim armiqësor dhe agresiv.
Ky zhvillim ka shtyrë liderët evropianë të rrisin diskutimet për forcimin e mbrojtjes kolektive, ndërsa raportet mes Perëndimit dhe Moskës mbeten të tensionuara.
