Eric Dane, aktori i njohur për rolin e tij si Dr. Mark Sloan në serialin e famshëm “Grey’s Anatomy” dhe për paraqitjen në serialin “Euphoria”, ka bërë publike një rrëfim prekës mbi betejën e tij me Sclerosin Laterale Amiotrofike (SLA), një sëmundje e rrallë neurodegjenerative.
Në një intervistë të dhënë për emisionin “Good Morning America”, Dane zbuloi se gjendja e tij shëndetësore është përkeqësuar ndjeshëm gjatë muajve të fundit. Sipas deklaratave të tij, sëmundja tashmë ka dëmtuar funksionimin e krahut të djathtë dhe ka filluar të përfshijë edhe krahun e majtë dhe këmbët, duke e kufizuar gjithnjë e më shumë në lëvizje.
“Simptomat filluan rreth një vit më parë,” – rrëfeu aktori. “Procesi për të marrë një diagnozë të saktë zgjati rreth nëntë muaj. Ka qenë një rrugëtim i vështirë dhe emocionalisht i rëndë.”
SLA është një sëmundje progresive që godet neuronet motorike në tru dhe në palcën kurrizore, duke shkaktuar dobësim të muskujve dhe humbje të kontrollit mbi lëvizjet vullnetare. Deri më tani, nuk ekziston një kurë për sëmundjen, dhe trajtimi konsiston kryesisht në ngadalësimin e përparimit të saj dhe përmirësimin e cilësisë së jetës së pacientit.
Fansat e Eric Dane në të gjithë botën kanë shprehur mbështetjen e tyre të fuqishme për aktorin, i cili me guxim dhe transparencë ka vendosur të flasë hapur për këtë sfidë të rëndë. Në rrjetet sociale, mijëra mesazhe inkurajuese dhe lutje janë shpërndarë për të, duke dëshmuar dashurinë dhe respektin që publiku ka për të, jo vetëm si aktor, por edhe si njeri.
