Lamine Yamal ka mohuar se ka tentuar të zhvillojë një takim me një aktore filmash për të rritur, ndërkohë që në mediat spanjolle ka shpërthyer një debat se kush e pengoi në të vërtetë një takim të mundshëm mes 17-vjeçarit dhe 29-vjeçares.
Ylli i Barcelonës është bërë një nga emrat më të përfolur në futboll muajt e fundit, falë performancave mbresëlënëse si me klubin ashtu edhe me kombëtaren e Spanjës.
Gjatë pushimeve jashtë sezonit, Yamal ka shfrytëzuar kohën për t’u çlodhur. Aktualisht ai ndodhet në Rio de Janeiro me idhullin e tij, Neymar, ndërkohë që më herët ishte parë me pushime me një grua 12 vjet më të madhe se ai.
Së fundmi, vetëm pak ditë pas publikimit të disa fotove të Yamal me modelen e OnlyFans, Fati Vazquez, ai është përfshirë në një tjetër histori të ndjeshme – këtë herë me modelen tjetër Claudia Bavel.
Në emisionin televiziv spanjoll TardeAR, u transmetua një bisedë “jashtë kamerave” me Yamal, ku ai deklaronte se nuk ishte takuar me Bavel sepse “nuk ishte i interesuar” në një komunikim me të.
Gazetari i emisionit, Álex Álvarez, shtoi më tej se kishte pasur pretendime se Claudia Bavel planifikonte të merrte një fotograf për të realizuar foto të një takimi të mundshëm me Yamal, me synimin për t’i shitur ato më pas. Yamal mohoi gjithçka, duke shtuar se një gjë e tillë nuk do të kishte qenë e mundur sepse ai jeton me nënën e tij, e cila nuk lejon njerëz të panjohur në shtëpi.
Por Claudia Bavel reagoi vetë publikisht në rrjetet sociale, duke dhënë versionin e saj të ngjarjes.
Modelja, e cila ishte e ftuar gjithashtu në emisionin TardeAR të premten në mbrëmje, i është drejtuar ndjekësve të saj (259,000 në Instagram) me këtë mesazh:
“Zgjodha të mos flas publikisht për këtë çështje gjatë vitit 2025. Por pasi Lamine Yamal përmendi marrëdhënien tonë të supozuar në TardeAR, e shoh të përshtatshme të ndaj versionin tim me qartësi dhe respekt.
“Ai pretendon se jeton me nënën e tij, por në realitet jeton vetëm. Thotë se më ka refuzuar, ndërkohë që ishte ai që kërkoi kontaktin tim dhe këmbënguli për t’u takuar. Mohon se jemi takuar ndonjëherë, megjithëse jemi ndeshur në disa evente sociale.
“Me respekt, kërkoj që të ndalen mesazhet fyese dhe shpifëse. Nuk kam pasur ASNJËHERË marrëdhënie me një të mitur, nuk kam organizuar asnjë takim, dhe nuk ka pasur ndonjë plan për famë apo përfitime financiare.
“E vetmja gjë për të cilën jemi dakord me Lamine është se nuk ka ndodhur kurrë asnjë takim apo situatë mes nesh. Pas titujve dhe opinionit publik, qëndrojnë njerëz të vërtetë. Për respekt, kërkoj mirëkuptim dhe përmbajtje”.
