Në Konventën e Përgjithshme të njëmbëdhjetë të Partisë Demokratike të Kosovës (PDK), e mbajtur sot në Prishtinë, Memli Krasniqi është rizgjedhur kryetar i kësaj partie, duke marrë besimin e delegatëve për një mandat të ri në krye të subjektit politik që doli i dyti në zgjedhjet e fundit parlamentare.
Në fjalimin e tij pas rizgjedhjes, Krasniqi falënderoi delegatët për mbështetjen dhe besimin e dhënë, duke theksuar se do të angazhohet me përkushtim për të rikthyer PDK-në si forcën udhëheqëse në vend.
“Krejt çka di dhe krejt çka mundem do ta bëj për ta rikthyer Partinë Demokratike të Kosovës aty ku e ka vendin, si partinë më të madhe dhe udhëheqëse të Republikës së Kosovës,” deklaroi ai.
Krasniqi kujtoi rrugëtimin e tij politik që nga pranvera e vitit 2004, kur iu bashkua PDK-së pa e imagjinuar se një ditë do të udhëhiqte partinë e themeluar nga Hashim Thaçi dhe Kadri Veseli. Ai theksoi se përgjegjësia që i është besuar është nderi më i madh i jetës së tij politike.
Në vijim të fjalimit, lideri i PDK-së kritikoi qeverisjen aktuale dhe theksoi nevojën për një drejtim të ri për Kosovën, duke përmendur zhvillimin ekonomik, sigurinë, drejtësinë dhe integrimin euroatlantik si prioritetet kryesore të partisë.
