Kryetari i Aleancës për Ardhmërinë e Kosovës (AAK), Ramush Haradinaj, ka shprehur shqetësimin e tij lidhur me krizën institucionale të krijuar nga dështimet e njëpasnjëshme për konstituimin e Kuvendit.
Në një deklaratë dhënë për media përpara nisjes së seancës konstituive të radhës, Haradinaj theksoi rëndësinë e ndërgjegjësimit të deputetëve dhe rolit të shoqërisë civile në këtë proces.
“Është shqetësim real edhe të gjithë i kanë të drejtat e veta, mundësitë e veta, përgjegjësitë e veta.
Unë mirëpres shoqërinë civile që na kujton detyrën tonë,” u shpreh Haradinaj, duke aluduar në performancën simbolike të organizuar më herët gjatë ditës nga organizatat e shoqërisë civile përpara Kuvendit të Kosovës.
Deklarata e liderit të AAK-së vjen në një moment kritik për vendin, teksa procesi i konstituimit ka hyrë në vazhdimin e 37-të pa një marrëveshje të qartë mes partive politike.
Haradinaj apeloi për reflektim institucional dhe përmbushje të përgjegjësive kushtetuese nga të gjithë aktorët politikë.
