Deputetja e Lëvizjes Vetëvendosje, Albulena Haxhiu – e propozuara e partisë për kryetare të Kuvendit – ka akuzuar partitë opozitare për bllokimin e vazhdueshëm institucional, duke pretenduar se zgjerimi i mandatit qeverisës të Albin Kurtit është pasojë direkte e mosvotimit të komisionit ad-hoc për votimin e fshehtë.
Në një deklaratë për media pas dështimit të radhës të seancës konstituive, Haxhiu tha se çështja aktuale nuk ka të bëjë me votat për të si kandidate, por me mungesën e vullnetit për të ndërtuar mekanizmin që lejon procedurën e votimit.
“Nuk po flasim më për emrin. Çështja është te Komisioni për votimin e fshehtë. Opozita nuk lejon të vazhdojmë përpara, madje nuk e lejon as propozimin e radhës,” tha ajo, duke lënë të hapur mundësinë që VV të rishqyrtojë emrin e kandidatit – por vetëm pas krijimit të Komisionit.
E pyetur për rolin e Vetëvendosjes në kapërcimin e ngërçit, ajo theksoi se përparësi mbetet përmbyllja e procesit të konstituimit dhe nisja e punës për formimin e qeverisë së re, për të cilën thotë se VV i ka numrat.
Haxhiu tha gjithashtu se presin vendimin e Gjykatës Kushtetuese mbi legjitimitetin e procedurës së votimit të fshehtë – çështje e dërguar për vlerësim nga AAK-ja – por theksoi se as një aktgjykim nuk zgjidh dot gjithçka në mungesë të pjesëmarrjes aktive nga të gjithë deputetët.
