Ish-presidenti amerikan Donald Trump ka bërë thirrje që kryeministri izraelit Benjamin Netanyahu të falet ose t’i anulohet gjyqi për korrupsion, duke e cilësuar atë si një “Hero të Madh” që ka bërë shumë për shtetin e Izraelit.
Trump, në një postim në platformën Truth Social të mërkurën, tha se Netanyahut duhet t’i ndalet menjëherë procesi gjyqësor, ose të falet, duke shtuar se SHBA-ja do ta shpëtojë atë, njësoj siç “shpëtoi Izraelin”. Netanyahu pritet të paraqitet në gjykatë të hënën.
Kryeministri izraelit përballet me akuza për ryshfet, mashtrim dhe shkelje të besimit në tri raste të ngritura në vitin 2019, të cilat ai i mohon kategorikisht. Procesi gjyqësor ka nisur në vitin 2020 dhe është ende në zhvillim.
Në reagim ndaj deklaratave të Trumpit, lideri i opozitës izraelite Yair Lapid tha se ish-presidenti amerikan nuk duhet të ndërhyjë në një proces ligjor të një shteti të pavarur.
“Shpresoj dhe besoj se ky është një shpërblim për presionin që synon t’i bëjë atij për Gazën dhe për një marrëveshje për pengjet”, tha Lapid për median izraelite Ynet.
Trump e përshkroi Netanyahun si një “luftëtar”, duke shtuar se SHBA-ja do të ndërhyjë për ta ndihmuar në sfidën e tij ligjore.
Nuk është e qartë nëse Trump nënkupton ndonjë veprim konkret nga ana e SHBA-së në këtë drejtim.
