E ardhmja e Lionel Messit mbetet një mister i madh për tifozët dhe ndjekësit e futbollit amerikan. Sulmuesi argjentinas, i cili aktualisht është pjesë e Inter Miami-t në Major League Soccer, ka një kontratë që skadon në fund të vitit 2025. Pavarësisht ndikimit të madh që ka pasur te klubi, ende nuk është arritur një marrëveshje për rinovimin e saj.
Mahonry Mendoza, drejtori i komunikimit i MLS-së, ka komentuar zhvillimet në një intervistë për median saudite Al-Riyadiyah, duke shtuar një dozë pasigurie, por edhe optimizmi rreth të ardhmes së Messit.
“Kontrata e Messit skadon në fund të sezonit, por e ardhmja e tij do të vendoset së bashku me menaxhmentin e Inter Miami,” deklaroi Mendoza, duke theksuar se vendimet do të merren në bashkëpunim të ngushtë me klubin.
Ndërkohë, Jorge Mas, bashkëpronar i Inter Miami-t, ka bërë të ditur se mbetet optimist për vazhdimin e bashkëpunimit edhe pas vitit 2025. Kjo mund të nënkuptojë përfshirjen e Messit në projektin e klubit edhe për Kupën e Botës 2026, që pritet të mbahet në SHBA, Meksikë dhe Kanada.
Mbetet të shihet nëse 37-vjeçari do të vijojë rrugëtimin në MLS apo do të vendosë për një tjetër sfidë në fund të kontratës aktuale
