Zyra e Presidentes së Kosovës ka njoftuar se presidentja Vjosa Osmani pritet të ftojë në ditët në vijim liderët e partive politike për konsultime, në përpjekje për të tejkaluar bllokadën institucionale dhe për të përmbushur vendimin e Gjykatës Kushtetuese lidhur me seancën konstituive të Kuvendit.
Këshilltari për media i presidentes, Bekim Kupina, konfirmoi se presidentja është e përkushtuar që procesi të përfundojë brenda afatit 30-ditor të përcaktuar nga Gjykata Kushtetuese, e cila në aktgjykimin e saj të 26 qershorit kërkon që seanca konstituive të përmbyllet deri më 26 korrik 2025.
“Presidentja pret që partitë e përfaqësuara në Kuvend ta zbatojnë Aktgjykimin e Gjykatës Kushtetuese… Nëse paraqitet nevoja, ajo mbetet e gatshme t’i drejtohet Gjykatës për sqarime shtesë,” tha Kupina për mediat në Kosovë.
Kuvendi i Kosovës deri tani ka dështuar në 39 përpjekje për konstituim, për shkak të mungesës së mbështetjes së gjerë për kandidaten e propozuar nga Lëvizja Vetëvendosje, Albulena Haxhiu, për postin e kryetares së Kuvendit. Partitë opozitare kanë kushtëzuar votën e tyre me ndryshimin e kandidaturës.
Situata vazhdon të mbetet konfuze, afati kushtetues po afrohet dhe ndërhyrja e sërishme nga Gjykata Kushtetuese nëse kriza nuk zgjidhet në kohë, mbetet opsion!
