Gara për kryetarin e Komunës së Mitrovicës ka marrë një kthesë të rëndësishme sot, pasi Arian Tahiri është konfirmuar zyrtarisht si kandidat i PDK-së për kryetar komune, me mbështetjen unanime të Kryesisë së Degës në këtë qytet.
Kandidatura e Tahirit u formalizua pas një procesi të rregullt statutor, ku u respektuan të gjitha procedurat e parapara nga rregullorja e partisë. Ai u votua pa asnjë kundërshtim nga anëtarët e Kryesisë, duke marrë kështu sinjalin e qartë për të hyrë në garë me mbështetje të fuqishme brenda strukturës lokale të PDK-së.
Në një postim publik pas këtij vendimi, Tahiri ka shprehur falënderim dhe përkushtim, duke e cilësuar këtë moment si një hap konkret drejt realizimit të një ëndrre të gjatë personale dhe politike.
“Nuk kam ardhur nga larg, por jam rritur këtu, me Mitrovicën në zemër. Është koha jonë!” – shkruan Tahiri.
Ai thekson se kandidatura e tij nuk është një ambicie personale, por një angazhim i thellë për qytetin dhe banorët e Mitrovicës, të cilët, siç tha, e kanë formuar dhe e kanë mbështetur ndër vite.
“Nuk po garoj për një pozitë, por për qytetin që dua, për njerëzit që më kanë rritur, më kanë mbështetur dhe më kanë dhënë forcë”, shkruan më tej ai.
Tahiri gjithashtu ka falënderuar Kryetarin e Degës së PDK-së në Mitrovicë, Bedri Hamza, për mbështetjen dhe besimin, duke theksuar se rruga drejt ndryshimit është “e përbashkët dhe kërkon sakrificë nga secili”.
Arian Tahiri është një figurë e njohur në Mitrovicë, i lindur dhe rritur në këtë qytet, me angazhim të gjatë në jetën publike dhe politike lokale. Ai pritet të jetë një nga kandidatët kryesorë në garën që pritet të zhvillohet në muajt në vijim, me fokus të veçantë në zhvillimin ekonomik, mirëqenien sociale dhe bashkimin e qytetit.
Kandidatura e tij shihet nga analistët politikë si një tentativë e PDK-së për të konfirmuar besimin e plotë në Mitrovicë, pas ndryshimeve të fundit politike në nivel lokal dhe qendror.
Fushata pritet të nisë së shpejti, dhe me konfirmimin zyrtar të kandidatit të parë, gara për Mitrovicën tashmë ka nisur.
A do të jetë “koha e tij” edhe për qytetarët? Mbetet të shihet në zgjedhjet e ardhshme.
