Një tjetër hap dramatik po merr formë në Lindjen e Mesme, ndërkohë që qeveria izraelite, përmes Ministrit të saj të Mbrojtjes, Israel Katz, ka njoftuar planet për të zhvendosur gjithë popullsinë palestineze të Gazës drejt një kampi të ashtuquajtur “qytet humanitar”, që pritet të ndërtohet mbi rrënojat e Rafahut – qyteti më jugor i Rripit të Gazës.
Sipas raportimeve të konfirmuara nga BBC, Katz ka udhëzuar Forcat e Mbrojtjes së Izraelit (IDF) të përgatisin një plan operacional për zhvendosjen e palestinezëve – fillimisht rreth 600 mijë vetë, për të përfunduar më pas me depopullimin e plotë të Gazës, ku aktualisht jetojnë mbi 2.1 milionë njerëz. Në deklaratën e tij, Katz tha qartë:
“Qëllimi është që të sillen njerëzit brenda, pas kontrolleve të sigurisë, për t’u siguruar që ata nuk janë njerëz të Hamasit.”
Plani në fjalë parashihet të nisë gjatë një armëpushimi 60-ditor, për të cilin aktualisht po zhvillohen negociata mes Izraelit dhe Hamasit. Por përtej deklaratave “humanitare”, ky veprim është duke u cilësuar nga zërat e pavarur si një përgatitje e pastër për deportim masiv dhe etnikisht të motivuar.
Avokati i njohur izraelit për të drejtat e njeriut, Michael Sfard, ka ngritur alarmin duke e quajtur planin një “krim kundër njerëzimit”, në shkelje flagrante të së drejtës ndërkombëtare.
“Bëhet fjalë për transferimin e popullsisë në skajin jugor të Gazës në përgatitje për deportim jashtë Rripit. Ky është një plan operacional për spastrime etnike dhe jo një ‘zgjidhje humanitare’,” – theksoi ai.
Ky zhvillim vjen në një kohë kur situata humanitare në Gaza është katastrofike, me mbi gjysmën e popullsisë të zhvendosur nga shtëpitë, mungesë totale të ndihmës bazike, dhe me infrastrukturën e shkatërruar nga sulmet e vazhdueshme izraelite që nga tetori i kaluar.
Plani i ri i Izraelit, sipas kritikëve, nuk është gjë tjetër veçse një përpjekje e maskuar për të boshatisur Gazën, nën pretekstin e sigurisë dhe menaxhimit të krizës. Termi “qytet humanitar” tingëllon si një “parfum diplomatik” mbi një realitet që shkel çdo standard të drejtësisë ndërkombëtare.
Zhvillimet e fundit e kthejnë vëmendjen e botës mbrapsht në historinë e Nakbës së vitit 1948, kur qindra mijëra palestinezë u dëbuan nga shtëpitë e tyre. Këtë herë, me shumë më tepër teknologji, kontroll mediatik dhe mbulim diplomatik – por me të njëjtin qëllim themelor: spastrim demografik i territorit.
