Presidenti Donald Trump tha se ka “shanse shumë të mira” për një armëpushim në Gaza këtë javë ose javën tjetër, pasi u takua të martën me kryeministrin e Izraelit Benjamin Netanyahu për herë të dytë brenda dy ditësh për të diskutuar situatën.
“Kemi një shans këtë javë ose javën tjetër,” u tha Trump gazetarëve.
“Do t’ju them se po i afrohemi shumë një marrëveshjeje. Nuk e di nëse është sekret apo jo, por nuk ka rëndësi për mua”, tha Trump gjatë një takimi me udhëheqësit afrikanë . “Ne duam të kemi një armëpushim, duam të kemi paqe, duam t’i kthejmë pengjet dhe mendoj se jemi afër arritjes së saj.”
I pyetur në lidhje me perspektivat realiste për një armëpushim këtë javë, Trump ofroi një optimizëm të kujdesshëm.
“Mendoj se kemi një shans këtë javë ose javën tjetër. Jo patjetër,” tha ai. “Por ka një shans shumë të mirë që të kemi një zgjidhje dhe marrëveshje të një lloji këtë javë dhe ndoshta javën tjetër, nëse jo.”
Komentet vijnë pas një deklarate të martën nga i Dërguari Special i SHBA-së për Misionet e Paqes, Steve Witkoff , i cili shprehu shpresë për një marrëveshje armëpushimi 60-ditore.
“Shpresojmë që deri në fund të kësaj jave, do të kemi një marrëveshje që do të na çojë në një armëpushim 60-ditor “, tha Witkoff pas përparimit në bisedimet e afërta.
Ushtria izraelite ka vrarë gati 57,700 palestinezë, shumica prej tyre gra dhe fëmijë, në Gaza që nga tetori i vitit 2023. Bombardimet e pandërprera kanë shkatërruar enklavën dhe kanë çuar në mungesë ushqimi dhe përhapje të sëmundjeve.
