Deputeti i vetëm shqiptar në Kuvendin e Serbisë, Shaip Kamberi, në një intervistë për gazetarin Enver Robelli, hedh dritë mbi diskriminimin e thellë dhe sistematik ndaj shqiptarëve në Luginën e Preshevës. Ai e cilëson qasjen e shtetit serb si një spastrim etnik të heshtur që po kryhet përmes pasivizimit të adresave, përjashtimit nga institucionet publike, mohimit të të drejtave arsimore e gjuhësore dhe krijimit të një ambienti të pasigurt për jetë.
“Nuk mund të ketë demokratizim të Serbisë pa njohjen e së kaluarës së saj të dhunshme dhe heqjen dorë nga ambiciet imperialiste. Shqiptarët në Luginë trajtohen si armiq të brendshëm,” thekson Kamberi, ndërsa shton se protestat aktuale në Serbi nuk i përfshijnë shqiptarët, të cilët ndihen të përjashtuar nga çdo proces politik dhe shoqëror.
Pasivizimi – një metodë represive për ndryshimin e përbërjes etnike
Sipas Kamberit, pasivizimi i adresave është metoda kryesore që po përdor Beogradi për të ulur numrin e shqiptarëve në regjistrat zyrtarë, duke i përjashtuar kështu nga votimet dhe përfitimet sociale. “Adresat shpallen joaktive në mënyrë arbitrare, kryesisht për shqiptarët që jetojnë në diasporë. Ky nuk është diskriminim klasik, është spastrim i heshtur burokratik,” paralajmëron ai.
Standardet e dyfishta të ndërkombëtarëve dhe heshtja ndaj diskriminimit
Kamberi kritikon ashpër qëndrimin e komunitetit ndërkombëtar, i cili sipas tij, mbyll sytë ndaj shkeljeve sistematike të të drejtave të shqiptarëve. “Serbët në Kosovë trajtohen si pakicë e klasit të parë, ndërsa ne në Serbi as nuk përmendemi,” shton ai.
Thirrje për strategji kombëtare nga Tirana dhe Prishtina
Në fund të intervistës, Kamberi paraqet pesë kërkesa urgjente për qeveritë e Kosovës dhe Shqipërisë:
– Hartimin e një strategjie kombëtare për Luginën me politika të qëndrueshme.
– Përfaqësim diplomatik të çështjes në arenën ndërkombëtare.
– Mbështetje për arsimin dhe mediat shqipe në Luginë.
– Fonde për zhvillim ekonomik dhe për diasporën.
– Koordinim institucional të përhershëm mes Prishtinës, Tiranës dhe përfaqësuesve të Luginës.
“26 vjet pas konfliktit, jemi të vetmuar përballë një shteti që na përjashton çdo ditë. Kjo nuk mund të vazhdojë pa pasoja,” përfundon Kamberi.
