Një incident alarmues ndodhi të martën në Aeroportin Ndërkombëtar të Vankuverit, një ndër nyjet më të mëdha ajrore të Kanadasë, i cili u detyrua të mbyllej për gati një orë pas raportimeve për rrëmbim të një aeroplani të vogël.
Sipas autoriteteve kanadeze, në orën 13:10 me orën lokale, u mor një njoftim për një avion të vogël Cessna me një motor dhe kapacitet katër-vendësh, që ishte rrëmbyer në zonën e Ishullit të Vankuverit dhe po i drejtohej hapësirës ajrore të aeroportit kryesor të qytetit.
“I dyshuari ishte i vetëm në bord,” deklaroi policia në një komunikatë për shtyp. “Ai u arrestua pa rezistencë dhe pa ndonjë incident pas uljes së avionit, rreth një orë më vonë.”
Ngjarja shkaktoi ndërprerje të menjëhershme në operacionet e aeroportit. Nëntë fluturime hyrëse u detyruan të devijonin drejt aeroporteve të tjera për arsye sigurie. Deri më tani, autoritetet nuk kanë dhënë hollësi mbi motivet e rrëmbimit apo identitetin e të dyshuarit.
Hetimet janë në vijim, ndërkohë që aeroporti ka rifilluar operimet normale pas rivendosjes së kontrollit të situatës.
