Shëngjini, një nga perlëzat bregdetare të Shqipërisë, po tërheq çdo ditë e më shumë vëmendjen e turistëve të huaj, duke u shndërruar në një destinacion të preferuar për udhëtarët që kërkojnë qetësi, natyrë të paprekur dhe mikpritje të ngrohtë.
Veçanërisht në zonën e Kunes, ka një rritje të ndjeshme të turistëve që mbërrijnë me kamperë nga vende të ndryshme të Evropës, përfshirë Gjermaninë, Zvicrën, Poloninë, Republikën Çeke, Holandën dhe më gjerë. Kjo rrymë e re turistike vjen si rezultat i kombinimit perfekt të bukurive natyrore me infrastrukturën në zhvillim dhe mikpritjen tradicionale shqiptare.
Vizitorët shprehen të entuziazmuar për gjelbërimin e harlisur, ajrin e pastër dhe ujërat e kristalta të bregdetit, si dhe për qetësinë që gjejnë në këtë zonë të veçantë. Një tjetër element që vlerësohet lart është siguria publike, që krijon një ndjesi komoditeti dhe lirie për pushuesit.
Pritja e ngrohtë nga banorët vendas dhe bizneset lokale është një tjetër faktor që e bën përvojën në Shëngjin të paharrueshme. Turistët ndihen të mirëpritur, të përfshirë dhe të respektuar, çka kontribuon në ndërtimin e një imazhi pozitiv për zonën dhe për Shqipërinë në përgjithësi.
Të gjitha këto tregues janë shenja të qarta se Shëngjini është në rrugë të mbarë për t’u pozicionuar si një nga destinacionet më të rëndësishme turistike në rajon. Me zhvillimin e vazhdueshëm të infrastrukturës dhe promovimin e vlerave natyrore e kulturore, turizmi ndërkombëtar pritet të jetë jo vetëm i pashmangshëm, por edhe një nga motorët kryesorë të zhvillimit ekonomik të këtij rajoni në vitet në vijim.
