Deputeti i Partisë Demokratike të Kosovës (PDK), Nait Hasani, ka dalë me një qëndrim të qartë dhe të prerë politik, duke e refuzuar publikisht mbështetjen për Fatmir Limajn si kandidat të mundshëm për postin e kryeministrit apo të kryetarit të Kuvendit. Në një deklaratë të fortë para medieve, Hasani theksoi se Kosova ka nevojë për qeverisje funksionale dhe mobilizim shtetëror për mbrojtjen e çështjes së UÇK-së në Gjykatën Speciale, jo për pazare politike dhe ndryshime oportuniste të qëndrimeve.
“Kosova sot ka nevojë për një qeverisje të qëndrueshme. Duhet të fokusohemi në mbështetjen e strukturave mbrojtëse në procesin e Gjykatës Speciale. Pas dështimit të mocionit atje, duhet ta mbështesim betejën e UÇK-së me avokatë e përkushtim, jo me kalkulime të ngushta personale,” deklaroi Hasani.
“S’kam votë për Fatmir Limajn – ka ndryshuar qëndrimet për Kurtin”
Duke komentuar spekulimet për një marrëveshje të mundshme rreth kandidimit të Fatmir Limajt, Hasani ishte i qartë: nuk do ta votojë, duke përmendur mungesën e qëndrueshmërisë në qëndrimet politike të këtij të fundit.
“Kam qenë dëshmitar i retorikës së Limajt ndaj Albin Kurtit para fushatës. Sot i ka ndërruar qëndrimet. Kjo nuk është politikë e parimeve. Nuk kam votë për të.”
Kjo deklaratë vjen në një moment kritik për skenën politike në Kosovë, pasi për herë të 49-të Kuvendi ka dështuar të konstituohet, duke mbajtur vendin në një ngërç institucional që po zgjat me muaj.
Hasani: Nuk mbaj përgjegjësi, fajin e kanë kryetarët e partive
Në mes të krizës politike, Hasani e ka bërë të qartë se nuk e ndjen veten përgjegjës për bllokimin e institucioneve, duke e adresuar këtë si një dështim të liderëve partiakë.
“Kryetarët e partive janë përgjegjës. Nëse ata merren vesh për një zgjidhje të qëndrueshme, atëherë edhe ne do të jemi për zgjidhje. Por jo nëse çdo kalkulim bëhet për interes personal.”
Hasani, sinjal kundër koalicioneve të paqarta?
Deklaratat e Hasanit shihen nga analistët si një refuzim i qartë i aleancave të paqarta dhe koalicioneve të imponuara nga lart, që nuk mbështeten në konsensus institucional e as në interes të shtetit.
Duke e përmendur në mënyrë të drejtpërdrejtë Gjykatën Speciale dhe luftën për dinjitetin e UÇK-së, Hasani i ka dhënë dimension tjetër debatit politik, duke e zhvendosur fokusin nga postet dhe kalkulimet, drejt një çështjeje të ndjeshme kombëtare dhe historike.
