Një person është arrestuar nga Policia e Kosovës pas të shtënave me armë zjarri në një aheng familjar që po mbahej në fshatin Mramor të Prishtinës.
Sipas njoftimit të Policisë, rreth orës 00:20 të mëngjesit të sotëm, është raportuar për të shtëna me armë zjarri. Njësitë policore të kryeqytetit kanë reaguar menjëherë dhe kanë dalë në vendin e ngjarjes, ku janë gjetur prova të qarta që konfirmojnë përdorimin e armës.
“Hetuesit policorë të kryeqytetit kanë siguruar prezencën e të dyshuarit F.A., 66 vjeç, i cili ka dorëzuar armët që kishte në posedim,” thuhet në njoftimin zyrtar të Policisë së Kosovës.
Në koordinim me Prokurorin e Shtetit, ndaj të dyshuarit është iniciuar rast penal për veprat “Armëmbajtje pa leje” dhe “Përdorim i armës apo mjetit të rrezikshëm”.
Policia ka përsëritur thirrjen për qytetarët që të shmangin përdorimin e armëve në tubime familjare apo publike, duke rikujtuar se veprimet e tilla paraqesin rrezik serioz për jetën dhe sigurinë publike dhe se do të përballen me masa të ashpra ligjore.
Hetimet për këtë rast janë në vazhdim.
