Kryetari i Nismës Socialdemokrate, Fatmir Limaj, ka shprehur skepticizëm lidhur me mundësinë e ndonjë përparimi në seancën e sotme konstituive të Kuvendit të Kosovës.
Duke folur para gazetarëve në hollin e Kuvendit, Limaj tha se nuk sheh asnjë sinjal që do të kishte ndryshim në qasjen institucionale, ndërsa theksoi se gjithçka varet nga vendimi i ardhshëm i Gjykatës Kushtetuese.
“Jo, nuk besoj që ka ndonjë ndryshim. Besoj se do të presim vendimin e Gjykatës. Nuk po shoh ndonjë mundësi të ndonjë ndryshimi sot,” u shpreh Limaj.
Këto deklarata vijnë në një kohë kur vendi ndodhet në bllokadë institucionale dhe konstituimi i Kuvendit po zvarritet për shkak të mungesës së konsensusit politik dhe ndalesës së përkohshme të vendosur nga Gjykata Kushtetuese. Vendimi përfundimtar i kësaj të fundit pritet të qartësojë hapat e mëtejmë të procesit.
