Kryeministri hungarez Viktor Orban ka paralajmëruar se Hungaria nuk do të japë mbështetje për buxhetin e ri shtatëvjeçar të Bashkimit Evropian nëse Brukseli nuk zhbllokon fondet e ngrira që i takojnë vendit të tij.
“Miratimi i buxhetit kërkon unanimitet. Derisa të marrim fondet tona, nuk do të ketë asnjë buxhet të ri të BE-së. Nuk do të bëjmë kompromis me sovranitetin,” deklaroi Orban.
Fondet e BE-së për Hungarinë janë pezulluar për shkak të shqetësimeve të Brukselit mbi sundimin e ligjit, kufizimet ndaj të drejtave të komunitetit LGBT+ dhe politikat mbi emigracionin. Kritika të shumta janë drejtuar ndaj Orban për prirjet autoritare dhe dobësimin e institucioneve demokratike.
Kreu nacionalist ka shtuar se udhëheqja aktuale e BE-së ka hyrë në një “luftë tregtare që Evropa nuk mund ta fitojë”, duke akuzuar Brukselin për paaftësi në negociatat ndërkombëtare. Sipas tij, “BE-ja do të jetë gjithmonë e fundit që nënshkruan marrëveshje me SHBA-në – dhe ato gjithmonë do të jenë marrëveshjet më të këqija.”
Në këtë kohë, janë rritur pritshmëritë për një marrëveshje tregtare mes Shteteve të Bashkuara dhe BE-së. Presidentja e Komisionit Evropian, Ursula von der Leyen, pritet të takohet me Presidentin amerikan, Donald Trump, në Skoci për të diskutuar çështjet e pazgjidhura.
Presidenti Trump ka vlerësuar se shanset për një marrëveshje janë “50 me 50”.
