Ramiz Lladrovci, kryetari aktual i Drenasit, ka deklaruar se nuk ka pasur asnjë kontakt me udhëheqësit e Partisë Demokratike të Kosovës që nga dita e diel, kur Kryesia e PDK-së vendosi të mos e mbështesë rikandidimin e tij për zgjedhjet lokale.
Në një deklaratë për Tëvë1 të hënën, Lladrovci ka thënë qartë se nuk ndjen nevojë të komunikojë me drejtuesit e partisë pas vendimit për të emëruar Petrit Hajdarin si kandidat zyrtar të PDK-së për komunën e Drenasit.
“Unë nuk kam folur me kërkënd dhe s’kam asnjë nevojë me fol me askënd”, u shpreh ai.
I pyetur nëse do të kandidojë sërish për kryetar të komunës, Lladrovci tha se këtë e ka bërë të ditur përmes një reagimi në rrjetet sociale.
“Besoj që janë të mjaftueshme ato që i keni parë në rrjetet sociale dhe e kuptoni vetë [nëse do të rikandidojë]”, shtoi ai.
Pas vendimit të PDK-së për të mos e përfshirë në garën e ardhshme, Lladrovci ka paralajmëruar kandidimin si i pavarur. Në një postim në rrjetet sociale ai shkroi:
“Qytetarët e komunës së Drenasit e kanë fjalën e fundit. Bashkë, vazhdojmë, +4!” – duke lënë të kuptohet qartë synimin për një mandat të katërt si kryetar komune.
