Në epokën e rrjeteve sociale, postimet e lojtarëve shpesh flasin më shumë se fjalët. Një shembull i qartë është reagimi i fundit i Ademola Lookman, i cili duket se ka shpërthyer pas vendimit të klubit të tij.
Sulmuesi nigerian është në qendër të interesimit të Interit, që ka bërë një ofertë prej 42 milionë eurosh plus 3 milionë në formë bonusesh për shërbimet e tij. Por Atalanta e ka refuzuar edhe këtë propozim, duke bllokuar kalimin e mundshëm të lojtarit te zikaltrit.
Reagimi i Lookman nuk ka vonuar. Ai ka fshirë nga llogaria e tij në Instagram të gjitha fotot ku shfaqet me fanellën e Atalantës dhe ka hequr nga biografia përshkrimin “lojtar i Atalantës”. Për më tepër, ai nuk ndjek më as profilin zyrtar të klubit në këtë rrjet social.
Sipas raportimeve, Lookman kishte arritur një marrëveshje personale me Interin për një kontratë deri në vitin 2030, me një pagë prej 4.5 milionë eurosh neto në sezon. Refuzimi i marrëveshjes nga Atalanta duket se ka zhgënjyer rëndë sulmuesin, i cili ka zgjedhur rrjetet sociale si mënyrë proteste.
Nuk është hera e parë që Lookman tenton të largohet nga Bergamo. Edhe një vit më parë ishte i lidhur me një kalim te PSG, por transferimi nuk u realizua dhe ai qëndroi te Atalanta. Këtë verë, megjithatë, sinjalet tregojnë se tensioni mes lojtarit dhe klubit është në rritje.
