Ish-presidenti amerikan, Donald Trump, ka publikuar një postim në rrjetin e tij social Truth Social, duke ndarë të dhëna shqetësuese për humbjet në njerëz gjatë luftës së vazhdueshme mes Rusisë dhe Ukrainës.
Sipas Trumpit, vetëm gjatë muajit të fundit, rreth 20,000 ushtarë rusë kanë humbur jetën në fushëbetejë. Ai e cilësoi luftën si “qesharake” dhe pa kuptim, duke nënvizuar se humbjet janë të panevojshme dhe mund të ishin shmangur.
“Sapo u informova se afro 20 mijë ushtarë rusë kanë humbur jetën vetëm gjatë këtij muaji në këtë luftë qesharake kundër Ukrainës,” shkroi Trump.
Ai shtoi se që nga fillimi i vitit 2025, Rusia ka pësuar rreth 112,500 viktima ushtarake.
Trump gjithashtu foli për humbjet në radhët e ushtrisë ukrainase, duke deklaruar se rreth 8,000 ushtarë ukrainas janë vrarë që nga 1 janari, pa përfshirë të zhdukurit.
“Ukraina ka vuajtur rëndë,” tha ai. “Ata kanë humbur rreth 8 mijë ushtarë.”
Ish-presidenti amerikan përmendi edhe viktimat civile, duke theksuar se megjithëse numri i tyre është më i ulët, popullata civile ka pësuar nga sulmet me raketa ruse në Kiev dhe qytete të tjera të Ukrainës.
Deklaratat e Trump vijnë në një kohë kur lufta në Ukrainë vazhdon të shkaktojë humbje të mëdha nga të dyja palët dhe rrit shqetësimin ndërkombëtar për përshkallëzimin e mëtejshëm të konfliktit.
