Nënkryetarja e Lidhjes Demokratike të Kosovës, Doarsa Kica-Xhelili, ka reaguar ashpër ndaj thirrjeve raciste të bëra nga tifozë maqedonas në një sallë sportive në Kumanovë, ku në prani të Kryeministrit të Maqedonisë së Veriut, Hristjan Mickoski, u bë thirrje për vrasje dhe asgjësim të shqiptarëve “në dhoma të gazit”.
Ngjarjen ajo e ka cilësuar si një manifestim të “mendësisë së kalbur dhe zhurmës primitive”, duke shtuar se më shqetësuese se vetë thirrjet është heshtja që i shoqëroi ato.
Kica-Xhelili ka dënuar sidomos mungesën e reagimit nga liderët shtetërorë të Maqedonisë së Veriut, si dhe nga politikanët shqiptarë në pushtet, të cilët i ka akuzuar për dorëzim përballë fyerjeve ndaj identitetit kombëtar.
“Çdo akt nxitjeje urrejtjeje meriton reagim të menjëhershëm, veçanërisht nga ata që përfaqësojnë shqiptarët në institucionet e Maqedonisë së Veriut. Heshtja nuk është maturi, është bashkëfajësi,” ka shkruar ajo në një postim, duke shtuar se të mos reagosh nga pozita qeveritare është shenjë e dorëzimit, jo e pragmatizmit.
“Kur nuk jemi për veten, kush mund të jetë për ne?”, përfundon reagimi i saj.
