Rreth 600 ish-zyrtarë të lartë të sigurisë izraelite, përfshirë ish-drejtues të Mossad-it, Shin Bet-it dhe Forcave të Mbrojtjes së Izraelit (IDF), i kanë dërguar një letër ish-Presidentit amerikan Donald Trump, duke i kërkuar të ndërhyjë për të bindur kryeministrin Benjamin Netanyahu të ndalë ofensivën ushtarake në Gaza. Lajmi është raportuar nga “Jerusalem Post”.
Nënshkruesit janë pjesë e grupit “Komandantët për Sigurinë e Izraelit” (CIS), një organizatë që përfshin figura të larta nga ushtria, inteligjenca, policia dhe diplomacia izraelite. Sipas tyre, reputacioni ndërkombëtar i Izraelit po dëmtohet dhe legjitimiteti global po lëkundet.
Në letrën drejtuar Trump-it, CIS thekson se IDF ka përmbushur dy objektiva kryesore: shkatërrimin e kapaciteteve ushtarake të Hamasit dhe rrëzimin e strukturës së tij qeverisëse. Objektivi i tretë – kthimi i pengjeve – sipas tyre, mund të arrihet vetëm përmes negociatave.
“Ndaloje luftën në Gaza! E keni bërë në Liban, tani është koha ta bëni edhe në Gaza,” thuhet në apel. Ata argumentojnë se Hamasi nuk përbën më një kërcënim strategjik dhe se operacionet e mbetura mund të kryhen në mënyrë të targetuar më vonë. “Pengjet tona nuk mund të presin,” theksojnë ata.
CIS i kërkon Trump-it të përdorë ndikimin e tij te publiku dhe qeveria izraelite për të ndalur luftën, për të lehtësuar lirimin e pengjeve dhe për të ndihmuar në krijimin e një koalicioni ndërkombëtar që mbështet Autoritetin Palestinez si alternativë ndaj Hamasit.
