Samiti i Procesit të Berlinit do të zhvillohet këtë vit në Londër, gjatë muajit tetor, dhe Kosova ka konfirmuar pjesëmarrjen e saj, ka bërë të ditur Ambasada e Mbretërisë së Bashkuar në Prishtinë.
Emisarja britanike, Dame Karen Pierce, është shprehur se pret të takojë përfaqësuesit kosovarë gjatë takimeve të këtij samiti. Ajo ka zhvilluar një bisedë me kryeministrin në detyrë të Kosovës, Albin Kurti, me fokus tensionet e fundit midis Kosovës dhe Serbisë.
“Diskutuam për zhvillimet e fundit dhe rëndësinë e vazhdimit të dialogut të ndërmjetësuar nga Bashkimi Evropian,” ka deklaruar Pierce, duke theksuar se Mbretëria e Bashkuar mbetet e përkushtuar për paqen dhe stabilitetin në rajon. Ajo shtoi se Londra mezi pret të mirëpresë delegacionin e Kosovës në tetor.
Pierce pritet të zhvillojë takime edhe me presidentin e Serbisë, në kuadër të përpjekjeve britanike për uljen e tensioneve dhe nxitjen e bashkëpunimit rajonal.
Samitet e Procesit të Berlinit organizohen çdo vit për të nxitur bashkëpunimin mes vendeve të Ballkanit Perëndimor – Kosovës, Shqipërisë, Serbisë, Bosnje e Hercegovinës, Malit të Zi dhe Maqedonisë së Veriut – dhe për t’i afruar ato më shumë me Bashkimin Evropian.
