Ushtarët italianë të Komandës Rajonale Perëndim (RC-W) të misionit paqeruajtës të udhëhequr nga NATO, KFOR, kanë kryer patrullime të rregullta në komunën e Istogut, me qëllim rritjen e sigurisë për të gjitha komunitetet që jetojnë në këtë zonë.
Sipas njoftimit zyrtar, aktivitete të tilla kontribuojnë në forcimin e mjedisit të sigurt dhe dëshmojnë përkushtimin e palëkundur të KFOR-it për të garantuar paqe dhe siguri të qëndrueshme për të gjitha etnitë në Kosovë.
KFOR-i ka theksuar se vazhdon ta zbatojë mandatin e vet të bazuar në Rezolutën 1244 të Këshillit të Sigurimit të OKB-së të vitit 1999, duke ofruar një ambient të sigurt për të gjithë qytetarët dhe duke mundësuar lirinë e lëvizjes në mënyrë të paanshme dhe të pandërprerë.
Operacionet në terren realizohen në koordinim të ngushtë me Policinë e Kosovës dhe misionin e BE-së për Sundimin e Ligjit (EULEX), në respektim të roleve të tyre si përgjigjës të sigurisë në terren.
