Prokuroria Speciale e Republikës së Kosovës (PSRK) ka bërë të ditur se përveç rastit të vrasjes së trefishtë në Gjilan, i dyshuari Mefail Shkodra po hetohet edhe në dy raste të ndara penale.
Sipas komunikatës së publikuar nga PSRK, më 25 prill 2025 Policia e Kosovës ka paraqitur një kallëzim penal ndaj Shkodres nga qytetari B.H. Po atë ditë, Prokuroria ka nisur veprimet hetimore dhe ka autorizuar hetuesit policorë për ndërmarrjen e masave të nevojshme ligjore.
“Në këtë rast, Prokuroria nuk ka paraqitur kërkesë për caktimin e masës së paraburgimit, pasi në fazën fillestare të procedurës ishin të nevojshme veprime të tjera hetimore për verifikimin e pretendimeve dhe sqarimin e rrethanave të rastit. Paraburgimi mund të kërkohet vetëm kur ekzistojnë prova të mjaftueshme dhe plotësohen kushtet ligjore të parashikuara në Kodin e Procedurës Penale,” thuhet në njoftim.
Në rastin e parë, Shkodra dhe një person tjetër me inicialet E.SH. kishin qëndruar në paraburgim për katër muaj për disa vepra penale, përfshirë fajden dhe detyrimin. Pas kërkesës së avokatëve për zëvendësimin e masës me dorëzani, Gjykata Themelore në Prishtinë e kishte përcjellë kërkesën për vlerësim në Prokurori. Pas analizës, PSRK kishte propozuar ndryshimin e masës së sigurisë dhe Gjykata kishte miratuar lirimin me dorëzani, duke konstatuar se nuk ekzistonin më kushtet ligjore për vazhdimin e paraburgimit.
Prokuroria bën të ditur se, në kuadër të këtij hetimi, janë sekuestruar në total nëntë prona të paluajtshme që lidhen me të pandehurit.
