Në një histori që ka lënë të tronditur familjen dhe opinionin publik, djali i ish-ushtarit të Ushtrisë Çlirimtare të Kosovës, Fadil Fazliu, prej gati një viti nuk ka mundur as ta shohë e as ta dëgjojë të atin, i cili po mbahet në paraburgim në Hagë nën akuzat për pengim të drejtësisë.
Fahri Fazliu rrëfen se Gjykata e Hagës ia ka ndaluar çdo formë kontakti me babanë, ndryshe nga pjesa tjetër e familjes që ka mundësi ta vizitojë. Ai e quan këtë vendim jo vetëm të pakuptimtë, por edhe një shkelje të rëndë të të drejtave themelore të njeriut.
“Këtë muaj bëhen plot 9 muaj që nuk mund ta shoh babin, as përmes videolidhjes, as fizikisht. Ai po mbahet atje padrejtësisht dhe mua po më mohohet e drejta elementare si bir. Është një mërzi e madhe, një dhimbje që nuk po përshkruhet dot”, thotë Fahriu me zërin e thyer.
Në dhjetor, kur familja kishte kërkuar leje për vizitë, nga Dhomat e Specializuara iu kthye një përgjigje e ftohtë: “Nuk mundesh ta takosh”, pa dhënë asnjë arsyetim pse. Kjo heshtje nga institucionet, sipas tij, është edhe më e rëndë se ndalimi vetë.
Fahriu e përshkruan mungesën e babait si një boshllëk të pamatë.
“Mungesa ndihet në çdo moment – në shtëpi, në përvjetorët e dëshmorëve, në shoqëri. Ditëlindja e tij kaloi në heshtje e mall. Ndihem sikur po e përjetoj një dënim të dytë, pa qenë fare fajtor,” shprehet ai.
Megjithëse nuk sheh një institucion ku të gjejë drejtësi, ai mban shpresën se e vërteta do të dalë në shesh dhe se një ditë do t’i shtrëngojë përsëri dorën babait të tij.
