Kreu i Hezbollahut, Naim Qassem, ka paralajmëruar për përballje të hapur, deri në luftë, nëse qeveria e Libanit vijon me planin për çarmatosjen e grupit militant. Ai e ka cilësuar këtë nismë si një përmbushje të interesave të SHBA-së dhe Izraelit.
Javën e kaluar, Këshilli i Ministrave miratoi vendimin që i kërkon ushtrisë hartimin e një plani për çarmatosjen e Hezbollahut, me afat zbatimi deri në fund të vitit, duke i hapur rrugën sfidës më të madhe ndaj këtij grupi që nga fundi i luftës civile në vitin 1990.
Qassem e ka quajtur vendimin “të rrezikshëm” dhe një kërcënim që mund të sjellë kriza më të mëdha, duke “zhdukur rezistencën e Libanit” në rast nevoje për mbrojtje ndaj agresorëve. Ai është zotuar se Hezbollah nuk do t’i dorëzojë armët dhe ka kërcënuar se çdo përpjekje e qeverisë për t’u përballur me ta do të përfundojë në konflikt të armatosur.
“Lëvizja jonë do të luftojë një betejë historike kundër projektit amerikano-izraelit, nëse është e nevojshme. Askush nuk do të mbetet gjallë nëse na sfidojnë”, ka deklaruar ai.
Qassem ka akuzuar ekzekutivin libanez se mban përgjegjësinë e plotë për çdo krizë apo shkatërrim që mund të pasojë, por ka theksuar se ende ka hapësirë për dialog, duke hedhur poshtë idenë e protestave për momentin. “Kjo është toka jonë e përbashkët, atdheu ynë i përbashkët. Jetojmë së bashku dhe nuk ka fat tjetër për Libanin”, ka shtuar ai.
