As Albulena Haxhiu, as Donika Gërvalla Schwarz nuk arritën të sigurojnë votat e nevojshme për t’u zgjedhur kryetare e Kuvendit të Kosovës, duke e zhytur procesin konstituiv në një krizë të re politike.
Në seancën e sotme, nga 116 deputetë të pranishëm, Haxhiu mori vetëm 57 vota për, 56 kundër dhe 3 abstenime – një rezultat që pasqyron polarizimin ekstrem dhe mungesën e koordinimit politik. Pas këtij dështimi, Lëvizja Vetëvendosje nxitoi të propozojë Donika Gërvallën si alternativë, por edhe ajo përfundoi me të njëjtin rezultat: 57 për, 56 kundër, 3 abstenime.
Seanca u mbajt pas publikimit të aktgjykimit të plotë të Gjykatës Kushtetuese, e cila përcakton qartë: kryeparlamentari duhet të zgjidhet brenda 30 ditësh përmes votimit të hapur, me mundësi vetëm tri herë për të votuar të njëjtin kandidat.
Ky dështim i dyfishtë ngre pikëpyetje serioze mbi aftësinë e Vetëvendosjes për të ndërtuar konsensus dhe për të respektuar afatet kushtetuese. Me dy raunde të konsumuar dhe pa asnjë rezultat, rreziku për bllokim institucional është më i madh se kurrë.
A do të arrijë Vetëvendosje të gjejë një emër që bashkon shumicën parlamentare, apo po shkon drejt konsumimit të mundësive kushtetuese pa zgjidhje? Koha po ecën, ndërsa Kuvendi mbetet pa drejtim.
