Shtetet e Bashkuara të Amerikës kanë vendosur sanksione ndaj gjyqtarit francez Nicolas Yann Guillou, i cili kishte pasur rol kyç në procedurën paraprake kundër ish-presidentit të Kosovës, Hashim Thaçi, në Gjykatën Speciale.
Departamenti Amerikan i Shtetit, përmes një deklarate, bëri të ditur se sanksionet lidhen me vendimin e Guillou për të autorizuar lëshimin e urdhër-arresteve ndërkombëtare ndaj kryeministrit izraelit, Benjamin Netanyahu, dhe ish-ministrit të Mbrojtjes, Yoav Gallant, në lidhje me akuza për krime lufte.
Ky vendim ka nxitur reagim të menjëhershëm nga administrata amerikane, e cila si kundërpërgjigje e ka futur gjyqtarin francez në listën e sanksioneve.
Përveç Guillou, sanksione janë vendosur edhe ndaj tre figurave të tjera të Gjykatës Ndërkombëtare Penale (ICC): Kimberly Prost, Nazhat Shameem Khan dhe Mame Mandiaye Niang. Ky veprim shihet si pjesë e presionit të vazhdueshëm të SHBA-ve ndaj ICC-së për hetimet që përfshijnë liderët dhe autoritetet e Izraelit.
