Pamje të publikuara nga agjencia shtetërore KCNA tregojnë liderin e Koresë së Veriut, Kim Jong-un, duke marrë pjesë në një ceremoni zyrtare zie për ushtarët e rënë në luftën e Rusisë kundër Ukrainës.
Ceremonia u mbajt të premten në selinë e Partisë së Punëtorëve në Phenian, ku u nderuan komandantë dhe luftëtarë të njësisë së operacioneve të jashtme të Ushtrisë Popullore Koreane.
Fotot e shpërndara globalisht nga KCNA nuk lënë vend për dyshime: Koreja e Veriut jo vetëm që ka marrë pjesë në luftën në Ukrainë, por tani e pranon publikisht këtë përfshirje.
Sipas ekspertit të Koresë, Frederik Spohr, kjo është një sinjal i drejtpërdrejtë për Moskën se mbështetja nga Pheniani nuk do të ndalet.
“Lufta nuk fshihet më, por po mbrohet gjithnjë e më shumë përmes propagandës. Kjo tregon se angazhimi ushtarak i Koresë së Veriut nuk është drejt përfundimit – përkundrazi,” tha Spohr për gazetën gjermane Bild.
Në korrik 2025, gjatë një takimi me ministrin e jashtëm rus Sergej Lavrov, Kim Jong-un konfirmoi se Koreja e Veriut do të mbështesë pa kushte Rusinë në luftën kundër Ukrainës. Ai deklaroi se Pheniani ndan të njëjtat qëndrime strategjike me Moskën dhe do të vazhdojë të mbështesë çdo veprim të Rusisë për zgjidhjen e krizës ukrainase.
Që nga vizita e Putinit në Phenian në verën e vitit 2024, dy vendet kanë nënshkruar një partneritet strategjik dhe ushtarak. Kim ka dërguar armë – kryesisht artileri dhe raketa – për ushtrinë ruse, si dhe trupa për të ndihmuar në rikthimin e territoreve të humbura në perëndim të Rusisë.
Sipas vlerësimeve të inteligjencës ukrainase dhe asaj koreano-jugore, deri në 14.000 ushtarë nga Koreja e Veriut kanë marrë pjesë në luftime. Mediat raportojnë se Pheniani mund të dërgojë deri në 30.000 trupa të tjera në muajt në vijim.
