Partia Demokratike e Kosovës (PDK) ka njoftuar se nuk do të marrë pjesë në mbledhjen e Kryesisë së Kuvendit të thirrur për ditën e hënë, duke e cilësuar ftesën si të pakuptimtë për shkak të mungesës së konstituimit të plotë të Kuvendit.
Në deklaratën publike, PDK thekson se procesi i themelimit të institucioneve shtetërore po zvarritet qëllimisht nga partia fituese e zgjedhjeve, duke e cilësuar këtë si një rrezik serioz për funksionimin demokratik të Republikës së Kosovës.
“PDK vlerëson se zvarritjet e qëllimshme në procesin e themelimit të institucioneve shtetërore, të shkaktuara nga partia e parë, janë skajshmërisht të rrezikshme për Republikën e Kosovës,” thuhet në njoftim.
PDK rikujton se, pavarësisht mungesës së një detyrimi kushtetues apo politik, ka votuar për Kryetarin e Kuvendit me qëllim të zhbllokimit të institucionit më të lartë përfaqësues të qytetarëve.
“Partia Demokratike e Kosovës mori mbi vete përgjegjësinë institucionale duke votuar për Kryetarin e Kuvendit,” thuhet më tej në komunikatë.
Moskonstituimi i plotë i Kuvendit, përfshirë mungesën e zgjedhjes së nënkryetarit nga komuniteti serb, vazhdon të jetë pikë përplasjeje mes partive parlamentare, duke reflektuar tensionet në skenën politike dhe sfidat në funksionimin institucional
