Kapiteni i Kosovës, Amir Rrahmani, nuk do të jetë i gatshëm për ndeshjen e sotme kundër Suedisë, pasi ka pësuar një dëmtim në këmbën e djathtë gjatë përballjes me Zvicrën.
Napoli, kampioni në fuqi i Italisë, ka konfirmuar se mbrojtësi i tyre ka kaluar testet mjekësore dhe ka rezultuar me një këputje të lehtë të bicepsit femoris në kofshën e djathtë.
“Pas dëmtimit të pësuar në ndeshjen midis Zvicrës dhe Kosovës, mbrojtësi iu nënshtrua analizave në Spitalin Pineta Grande, të cilat konfirmuan rezultatet e analizave fillestare të kryera me ekipin kombëtar: një këputje e lehtë e bicepsit femoris në kofshën e djathtë. Rrahmani tashmë ka filluar rehabilitimin e tij”, thuhet në njoftimin e klubit italian.
Mungesa e Rrahmanit është një goditje e rëndësishme për Kosovën në kuadër të ndeshjeve kualifikuese, ndërkohë që mbetet të shihet sa do të zgjasë rikuperimi i tij dhe kur do të rikthehet në fushë.
