Një operacion i përbashkët mes Policisë së Beratit dhe Prokurorisë ka zbuluar një skemë të rrezikshme eksporti të produkteve bujqësore të kontaminuara, duke çuar në arrestimin e tre personave: administratorin e subjektit “Era-Fruit” dhe dy inspektorë të Autoritetit Kombëtar të Ushqimit (AKU).
Autoritetet kroate bllokuan dhe asgjësuan rreth 8 ton domate të eksportuara nga Shqipëria më 27 gusht, pasi analizat laboratorike zbuluan nivele të larta të preparatit të ndaluar “Chlorfenapyr” – konkretisht 0.06 mg/kg, gjashtë herë mbi normën e lejuar prej 0.01 mg/kg.
Pas sinjalizimeve për parregullsi në eksport, Seksioni për Hetimin e Krimeve Ekonomike dhe Financiare, në bashkëpunim me Forcën e Posaçme Operacionale, finalizoi operacionin “Again”, duke arrestuar:
- Mariglen Qorri, 40 vjeç, administrator i “Era-Fruit”, i dyshuar për përdorimin e faturave fiktive për të fshehur origjinën e domateve të kontaminuara.
- Ronaldo Lika, 27 vjeç, dhe Griselda Doksani, 25 vjeçe, inspektorë të AKU-së në Berat, të akuzuar për falsifikim të praktikave inspektuese dhe mosmarrje të mostrave për analizë.
Sipas policisë, inspektorët kishin konstatuar shkelje në subjektin eksportues, por kishin pranuar si të rregullta faturat fiktive dhe nuk kishin bllokuar produktet. Gjatë kontrollit në magazinën e “Era-Fruit”, u sekuestruan perime të ndryshme dhe u morën mostra për analiza, pasi dyshohet se edhe ato mund të jenë të kontaminuara.
Materialet procedurale janë referuar Prokurorisë së Beratit për veprime të mëtejshme, ndërsa rasti ka ngritur shqetësime serioze për sigurinë ushqimore dhe integritetin e sistemit të kontrollit të produkteve bujqësore në Shqipëri.
